آ
بادشاہ اورنگزیب دے آخری دن
ارادة خاں لکھدا ہے کہ بادشاہ نال میرا انا موہ سی کہ جدوں میں دیکھیا کہ اس دا انتم سماں نیڑے ہے، تاں میں اس دے پلنگھ دی باہی پھڑ کے ہی بیٹھ گیا تے کتے لامبھے نہیں گیا۔ اک دن بادشاہ نے مینوں کیہا، ”ہن ساڈا وچھڑن دا ویلا آ گیا اے۔ اس لئی جے کدی جانے جاں انجانے میتھوں تیرے نال کوئی ودھیکی ہو گئی ہووے تاں آکھ کہ توں مینوں معاف کیتا۔ دلوں منوں انج تنّ واری کہہ۔…” پھیر کہن لگے، ”جے تیرے ولوں وی میرے پرتی کدی کوئی اوگیا ہو گئی ہووے تاں میں وی تینوں معاف کردا ہاں۔” بادشاہ دے بول سن کے میرا گلا بھر آیا۔ میتھوں بول نہیں سی ہندا۔ پر جدوں بادشاہ نے وار-وار مجبور کیتا تاں میں بڑے یتن نال تنّ وار کیہا، ”میں تہانوں معاف کردا ہاں” شہنشاہ دیاں اکھاں وچوں ہنجھو وگ رہے سن۔ میرا چہرہ وی اتھرواں نال بھجا ہویا سی۔
اورنگزیب نوں انتم سماں نزدیک دکھائی دے رہا سی۔ اوہ اس گلوں بڑا چنتت سی کہ میرے بعد شاہی فوج دا کی بنیگا جو راجدھانی (دلی) توں بہت دور دکھن وچّ ڈیرے لائی بیٹھی ہے۔ اس دی سرتی تناں شہزادیاں ولّ وی گھمدی سی تے اوہناں وچکار تخت-نشینی لئی ہون والا یدھ وی دکھائی دے رہا سی۔ (دو شہزادے محمد سلطان تے محمد اکبر مر چکے سن۔) سبھ توں ودھ اس نوں اپنی آتما دی چنتا سی۔…پتہ نہیں اﷲ دی کچہری وچّ میرے نال کی سلوک ہووےگا؟…اورنگزیب دی ایسی منودشا اس دیاں دو چٹھیاں وچوں جھلکدی ہے، جو اس نے اوہناں دناں وچّ اپنے پتراں محمد اعظم تے کام بخش نوں لکھیاں۔
محمد اعظم نوں اس نے لکھیا:
”اﷲ تینوں تندرست رکھے!…میرے اتے بردھ اوستھا آ گئی ہے۔ نربلتا نے مینوں دبا لیا ہے۔ میرا سارا سماں راج-ستا وچّ ہی بتیت ہو گیا۔ پر ہن افسوس ہی باقی رہِ گیا ہے۔ میرا قیمتی وقت وارتھ ہی گزر گیا۔ جیون سدا نہیں رہندا۔ بھوکھ دیاں امیداں ختم ہو رہیاں ہن۔ ہن مینوں بخار تاں نہیں ہے، پر میری چمڑی تے ہڈیاں ہی باقی رہِ گئیاں ہن۔ میرا پتر (کامبکھش) بیجاپر ولّ گیا ہے۔ پر نیڑے ہی ہے۔ توں ہور وی نیڑے ہیں۔ آدر دا پاتر (محمد معظم) شاہ عالم بہت دور ہے۔ شاہی کیمپ دے سارے لوک میرے وانگ بھیبھیت ہن تے پارے وانگ کمب رہے ہن۔ میں اس سنسار وچّ کجھ لے کے نہیں آیا سی تے نہ ہی ہن کجھ لے کے چلیا ہاں۔ مینوں اپنی مکتی بارے بہت چنتا ہے۔ پتہ نہیں اگے جا کے مینوں کی کی تسیہے ملنگے؟ بے شکّ مینوں اﷲ دے رحم اتے مہربانی اتے یقین ہے، پر مینوں اپنے کرماں توں ڈر لگدا ہے۔ کجھ وی ہووے، میں اپنی کشتی لہراں دے حوالے کر دتی ہے۔ بھاویں شاہی کیمپ دی رکھیا خدا کریگا، پر پرگٹ روپ وچّ تاں میرے پتراں نوں ہی ادم کرنا پویگا۔…اچھا الوداع، الوداع، الوداع۔”
اس نے اپنے سبھ توں چھوٹے پتر کام بخش نوں وی اک چٹھی لکھی:
”دل وچّ سمائے میرے پتر…میں اپنی تچھتا دا انوبھوَ کردا ہویا سنسار توں جا رہا ہاں۔ میں اپنے پاپاں تے اؤگناں دا پھل اپنے نال لجا رہا ہاں۔ جیون-کارواں دے راہ نما نے میرا ساتھ چھڈّ دتا ہے۔ باراں دن مینوں بخار نے پیڑ سٹیا۔ ہن میں ٹھیک ہاں۔ میں جدھر دیکھدا ہاں، اﷲ ہی اﷲ دکھائی دندا ہے۔ کمزوری کارن میری قمر جھک گئی ہے تے لتاں وچّ چلن دی شکتی نہیں رہی۔ میں بڑے پاپ کیتے ہن۔ پتہ نہیں، اوہناں دی مینوں کی سزا ملیگی؟ مانو-جاتی دا رکھاک شاہی کیمپ دی رکھیا کریگا، پر اس دی چنتا دا بھار میرے پتراں اپر وی ہے۔ پرجا دی راکھی دا کم ہن خدا نے میرے پتراں نوں سونپیا ہے۔ اعظم شاہ چلا گیا ہے۔ ساودھان، کوئی مسلمان نہ ماریا جاوے اتے اس دا بھار میرے سر نہ چڑھے! میں تے وداع ہو رہا ہاں۔ تینوں تے تیری ماتا نوں خدا دے حوالے کردا ہاں۔ بہادر شاہ جتھے سی، اتھے ہی ہے۔ اس دا پتر ہندوستان دے نیڑے آ رہا ہے۔ بیداربکھت (محمد اعظم دا پتر) گجرات وچّ ہے۔ تیری ماتا ادیپری بیگم بیماری وچّ میرے نال ہے تے اوہ موت وچّ وی میرا ساتھ دینا چاہندی ہے، پر ہر اک دا سماں نشچت ہے۔
”گھر-باری اتے درباری چاہے کنے وی دھوکھے باز ہون، اوہناں نال دروہار نہیں ہونا چاہیدا۔ کوملتا اتے جگت نال لوک-رائے بناؤنی چاہیدی ہے۔ ہن میں جا رہا ہاں۔ بھلا-برا جو وی میں کیتا، تہاڈے لئی کیتا ہے۔
”کسے نے اپنی آتما نوں جاندے ہوئے نہیں دیکھیا، پر میں دیکھ رہا ہاں کہ ایہہ جا رہی ہے!…”
فروری 1707 دا مہینہ گھور سنکٹ دا مہینہ سی۔ اس دے شروع وچّ اورنگزیب اتے بیماری نے دوجی وار حملہ کیتا۔ بیماری دے دناں وچّ اوہ کلمہ، نماز تے تسبیح توں بناں ایہہ شعر اکثر گن-گنایا کردا سی:
بیک لہز، بیک سائت، بیک دم۔
دگرگوں میشود احوالِ عالم۔
(اک اکھ-جھمکے، اک گھڑی، اک سواس وچّ ہی سنسار دے حالات وچّ تبدیلی آ جاندی ہے)۔
اک فروری دا دن چڑھیا۔ اورنگزیب اپنی عادت انوسار تڑکے ہی بستر وچوں اٹھ گیا۔ باہر جا کے اس نے سویر دی نماز اتے کلمہ پڑھیا تے پھیر سون والے کمرے وچّ آ کے تسبیح پھیرن لگّ پیا۔ اوہ اﷲ دی بندگی وچّ مگن ہو گیا۔ پر چھیتی ہی بے ہوش ہو گیا تے اک پاسے نوں لڑک گیا۔ کہندے ہن، بے ہوشی دی حالت وچّ وی اس دیاں انگلاں تسبیح دے منکیاں اتے چلدیاں رہیاں۔ حکیماں نے بڑے اوڑھ-پوڑھ کیتے پر بادشاہ دا آخری وقت آ گیا سی۔ اک پہر دن چڑھے اس دی موت ہو گئی۔ اورنگزیب کیہا کردا سی کہ اس سنسار توں کوچ کرن لئی جمعے (شکروار) دا دن بہت شبھ ہندا ہے۔ خدا نے اس دی اچھا پوری کر دتی۔ 21 فروری 1707 ای. نوں شکروار ہی سی۔
شاہزادہ محمد اعظم اگلے دن شنچروار نوں اہمدنگر وچّ اپنے مرت پتا کول پہنچا۔ موت توں تنّ دن بعد سوموار نوں جنازہ نکلیا۔ اورنگزیب نے کجھ سماں پہلاں کھلداباد وچّ فقیر شیخ جیندین دے مقبرے دے ویہڑے وچّ اپنی قبر آپ ہی بنوا لئی سی۔ اورنگزیب توں اٹھ کوہ دور دولتاباد دے نیڑے کھلداباد وچّ بنی اسے قبر وچّ اورنگزیب نوں دفنا دتا گیا۔ تنّ گز لمے تے ڈھائی گز چوڑے لال پتھر دے چبوترے اتے تھوڑھی جہی اچی بنی ایہہ قبر دکھائی دندی ہے، جس اتے مگروں نیازبو دے کجھ بوٹے بیج دتے گئے۔
اورنگزیب بارے پرمانک اتہاسکار سر جادو ناتھ سرکار اورنگزیب دے چرتر دا سنکھیپ ملانکن اس طرحاں کردے ہن:
”اورنگزیب دے جیون دے آخری سال بے حدّ دکھ بھرے سن۔ اس دا ادھی صدی لما راج-کال بالکل اسپھل رہا۔…اس دا پروارک جیون وی پیارہین تے اداسی بھریا سی۔ اوہ اس شانتی اتے آشاواد توں ونچت رہا، جو بردھ اوستھا نوں سکھمئی تے گورومئی بنا دندا ہے۔ جیون دے آخری سالاں وچّ اس دے دل-دماغ اتے اکلیپن دا احساس چھایا رہا۔ اس نوں ہمیشہ ایہہ ڈر لگا رہندا کہ جے میرے پتراں نے وی میری کمزور بردھ اوستھا وچّ میرے نال اوہی سلوک کیتا جو میں اپنے باپ شاہ جہان نال کیتا سی، تاں کی ہووےگا؟…اورنگزیب وچّ ہمدردی، کلپنا، ویاپک درشٹی، سہردتا اتے ادارتا دا ابھاوَ سی۔ اس دے چرتر دیاں ایہناں کمیاں نے مغل سامراج نوں انا کھوکھلا کر دتا سی کہ اس دی موت توں بعد اوہ ہوا دے اک بلے نال ہی دھڑنم کرکے ڈگّ پیا۔ جو کجھ ایوگ، بے لوڑا اتے پرکرتی دے ورودھ ہندا ہے، کال اس نوں بڑی بے رحمی نال مٹا کے اڑا دندا ہے۔”
کوئی تبصرے نہیں:
ایک تبصرہ شائع کریں