گوندل

گوندل جٹ اج توں تقریباً اٹھ سوسال پہل حضرت بابا فرید گنج شکر رحمتہ اللہ علیہ اجمیر شریف دیاں رحمتاں تے برکتاں لے کے اجودهن ...ہنڑں دا پاک پتن...آنڑں کے ڈیرا لایا . باباجی دیاں ہدایت کانڑں بالیاں بتیاں دا چانن پورے ہندوستان دے وچ دور دور تک کهنڈ گیا. باباجی دیاں رحمتاں تے برکتاں نال جهنگ ساہیوال وہاڑی سرگودھا تے گجرانوالہ دے لوک مسلمان ہوے ہن.جس دے وچ گوندل برادری دا اسلام قبول کرن دا واقعہ وی ہے. اجودهن دے وچ ہندو پنڈتاں بڑا راج پیا چلدا ہئ . تے اسے شاہر دے وچ ہک ہندو جٹ رہندا ہئ جہڑا اجمیر شریف چهڈ کے آیا تے اہیہ اج توں تقریباً ساڈهے ست سو سال پہلوں دی گل اے جہڑے ہنڑں دی گوندل برادری دے وڈے وڈیرے ہن.برادری دے وڈیرے دا ناں گهنو آہی. جتها اس برادری دے وچ ترکڑے تے حوصلے آلے گبهرو ہانڑں اوتهاں برادری دے وڈے وڈیرے وی بہوں سمجھدار ہن . ساری برادری واہی کردی آہی تے ڈهوہر ڈنگر بڑے شوق نال رکهدے آہن . بابا فرید رحمتہ اللہ علیہ دے خلیفے تے مرید اسلام دی خدمت کردیاں اویاں روز اس برادری کول جاندے ہن.بابا جی دے حکم دے مطابق اونہاندے اگیر وی کر دیندے ہن . ایدهے نال نال اہناندیاں ڈھور ڈنگر چگنڑں وس تے جا وی دیندے ہن . سردار گهنو تےبابا جی دیاں اہنہاں محبتاں دا بڑا اثر ہویا تے اوہ شکریہ ادا کرن کانڑں بابا جی دے کول ٹر گیا اینج کر کے ساری برادری اتے بابا جی رحمتاں دا اثر ہونڑں لگ پیا.تے آخر اوہ ایئ ہویا جہڑا ہونڑاں ہایئ. سپاہیاں دیاں تلواراں تے اکهیں دیاں تلوار چها کے آپنڑا کم کر گیاں .... اگلی واری سردار گهنو آپنڑیاں نال جہڑے کجھ اگیر پچهیر وچ ہوندے آہس اونہن وی لے کے بابا فرید رحمتہ اللہ علیہ دے دربار تے اپڑ گیا. اہیہ سارےنظام الدین اولیاء تے دوجے خلیفیاں دے کول بیٹهے آہن . بہوئیں تے بہہ کے کهانڑں پینڑں دی ترتیب کیتی اوئ ہائ.کهانڑیں دے وچ ستوں باجرے دیاں روٹیاں ساگ گڑھ لسی ہائ . محفل چنگی بهلی سجھ دھج وچ ائ بابا جی دیاں خلیفیاں بہوں دماغ توں کم لے کے سارے پراہنڑیاں نوں اسلام قبول کرن دی دعوت دتی . برادری دا وڈیرا گهنو بولیا اسلام دیاں جتنڑیاں گلاں ساڈے کول اپڑیاں نوں اہناں دا اثر ساڈے تے ڈهیر سارا ہویا پر اسیں بیعت صرف بابا فرید رحمتہ اللہ علیہ دے ہتھ تے کرنی اے . گوندل برادری دے وڈیرے بڑے ہمت تے حوصلے آلے آہن پر رہن وس کوئی ہک پکی جا نا ہونڑں وس بڑے پرشان آہن اس وجہ توں اوسے ویلے اسلام قبول کرن دا فیصلہ نا کر سکیا . کجھ دناں توں بعد سارا ٹبر برادری کسے پکے ٹهکانڑیں دی ڈهوڈه وچ وسطی پنجاب آلے پاسے نکل پئے . ٹردیاں ٹردیاں گنجی بار ساندل بار کرنانہ بار دیاں کھلیاں علاقیاں وچوں لگهدا اویا چک عالم تحصیل پهالیہ ضلع گجرات دے وچ آ کے رکے . ایتهے اپڑن توں تھوڑے دیہاڑے بعد وچ سردار گهنو نوں پتہ لگا با بابا فرید رحمتہ اللہ علیہ سرگودھا دیاں جنگلاں وچ چلہ پئے کڈهدے نوں تے اتنے دور وی کوئ نہی. سردار گهنو بابا جی دے اخلاق تے رویے اجے تک بهلا ناہی سکیا اصل مسلماناں دے رویے اوہدے تے بڑا ڈهیر اثر کیتا اویا ہا تے اوہدے دل وچ اسلام دیاں روشنیاں چمکنڑں لگ پیاں ہائن . جیویں ایئ سردار گهنو نوں پتہ لگا بابا جی نیڑے جیہے ہن اوہس کجھ ہور نال دیاں وڈیریاں نوں اکٹها کیتا تے آکهنڑں لگا میں تے اسلام قبول کرن دا پکا ارادہ کر لیا .میں چاہنداں اگاں آر سارے رل کے چلیئے .سردار گهنو دی اہیہ گل سنڑدے سار ساری برادری ہکو آواز وچ آکهدی آ اسیں راضی آں تیری گل تے.برادری دے سارے کڑیاں چهوہر مرد عورتاں سنگ بنڑں کے بابا جی دی خدمت وچ جا کے حاضر ہو گئے. حضرت بابا فرید رحمتہ اللہ علیہ . آپ چک عالم توڑ گهنو دی ساری برادری دے اکٹھ کول آ گئے . ساریاں دا نوں آپنڑیں مبارک ہتھ دے نال بیعت کروائ . باباجی خود آپ تشریف لے کے آے آہن اس وس تے ساری برادری ہکو واری اسلام قبول کر لیا. اوہ ٹائیم ہائ پیشیں دا بابا جی اوچی آواز دے وچ بانگ دتی اوس توں بعد ساری برادری دے اکٹھ رل کے بابا جی دی امامت دے وچ نماز پڑهی . بابا فرید رحمتہ اللہ علیہ ساریاں کانڑں دعا خیر آکهی اہیہ دعا ہنڑں چنگا بهلا اثر رکهدی آہی اللہ تعالیٰ اوہناں نوں نسل و نسل امامت جہی اعلیٰ شے توں نوزیا. بابا فرید رحمتہ اللہ علیہ اوراں اس عظیم دعا توں بعد اس نویں مسلم برادری نوں بہوں ٹهوہ پکے ٹکانڑیں لبھ جانڑں دی خوشخبری وی سنڑا چهڈی تے بہوں ٹهو ایئ اس برادری نوں پکے ٹکانڑیں خوشیاں تے رب دیا نعمتاں لبھ گیاں . گوندل برادری ہک دوجے نال گل بات ملنڑں باہڑں کهلونڑں دا ہک آپنڑاں انداز اے جس دی وجہ توں اوتهوں دیاں رانجهیاں نال سلام دعا تے تعلق واستہ بنڑونڑں نوں کامیاب ہو گے .رانجھا برادری پهالیہ توں لے کے سرگودھا دے ڈهیر سارے کهلے علاقے دے ہکلے مالک آہن . رانجهے وی آپنڑیں تهاں تے گوندلاں آر کس گل تو گهٹ ناہن .آپنڑاں ٹوہر ٹپہ رکهدے آہن .رانجهیاں دی سنگت دی وجہ توں گوندلاں دیاں ڈنگر ڈهوہر چگنڑں کانڑں جہلم دے کنارے اتے تهاں مل گی . بهیرہ دے نیڑے ضلع سرگودھا دے وچ ہک لوک جس دا ناں پنڈ ہاتهی ونڈ آ اتهاں گجربڑا چهائے اوے آہن .رانجهیاں تے گوندلاں دے سنگ ساتھ دی وجہ توں گجراں نوں اہیہ علاقہ چهڈنڑاں پئے گیا جہڑے جا کے منڈی بهاوالدین دے اگاں پچهاں جا کے اباد ہوئے . واسو سوہاوہ وچکار حد بہجھ گئ اہنہاں دیہاڑیاں وچ گوندلاں گجراں دے ڈهیر سارے رقبے تے قبضہ کر لیا وت اہیہ تهاں گوندل بار اکهونڑں لگ پئی . اس برادری دے کجھ وڈیریاں اج توں تقریباً ساڈهے ترے سو سال پہل جہلم دیاں کجھ علاقیاں وچ جا کے ڈیرے لا لئے جہڑے اجے تک اباد ہین۔۔۔ .

Gondal